ನವದೆಹಲಿ:
ಚೀನಾ ಗಡಿಯಲ್ಲಿ ಯುದ್ಧ ರೀತಿಯ ಉದ್ವಿಗ್ನ ವಾತಾವರಣ ಕಂಡುಬರುತ್ತಿರುವ ಹಿನ್ನೆಲೆಯಲ್ಲಿ ಭಾರತದ ನೆರವಿಗೆ ಹಲವು ದೇಶಗಳು ಮುಂದೆ ಬಂದಿವೆ. ದೇಶಕ್ಕೆ ತುರ್ತು ಅಗತ್ಯವಿರುವ ಶಸ್ತ್ರಾಸ್ತ್ರ ಹಾಗೂ ಇನ್ನಿತರೆ ಯುದ್ಧ ಸಲಕರಣೆಗಳನ್ನು ನೀಡಲು ಫ್ರಾನ್ಸ್, ಇಸ್ರೇಲ್, ಅಮೆರಿಕ ಹಾಗೂ ರಷ್ಯಾ ಬದ್ಧತೆ ವ್ಯಕ್ತಪಡಿಸಿವೆ. ಇದರಿಂದಾಗಿ, ಮೆರೆಯುತ್ತಿರುವ ಚೀನಾಕ್ಕೆ ತಕ್ಕ ಬುದ್ಧಿ ಕಲಿಸಲು ಭಾರತಕ್ಕೆ ಮತ್ತಷ್ಟುಶಕ್ತಿ ಸಿಕ್ಕಂತಾಗಿದ್ದು, ನೆರೆ ದೇಶ ನಡುಗುವಂತಾಗಿದೆ. ಇದೇ ವೇಳೆ, ಪೂರ್ವ ಲಡಾಖ್ನಲ್ಲಿ ಸುದೀರ್ಘ ಬಿಕ್ಕಟ್ಟು ಸೃಷ್ಟಿಯಾಗಿರುವ ಹಿನ್ನೆಲೆಯಲ್ಲಿ ಸಶಸ್ತ್ರ ಪಡೆಗಳಿಗೆ ತುರ್ತು ಹಣಕಾಸು ಶಕ್ತಿ ಒದಗಿಸಲು ಸರ್ಕಾರ ನಿರ್ಧರಿಸಿದೆ ಎಂದು ವರದಿಗಳು ತಿಳಿಸಿವೆ.
ಕಾರ್ಗಿಲ್ ಸಮರದ ಸಂದರ್ಭದಲ್ಲಿ ಭಾರತದ ಜತೆ ನಿಂತಿದ್ದ ಇಸ್ರೇಲ್ ಇದೀಗ ಚೀನಾ ಸಂಘರ್ಷ ಸೃಷ್ಟಿಯಾಗಿರುವ ಸಂದರ್ಭದಲ್ಲೂ ಭಾರತಕ್ಕೆ ನೆರವಾಗಲು ಮುಂದೆ ಬಂದಿದೆ. ಎದುರಾಳಿ ದೇಶಗಳ ಕ್ಷಿಪಣಿ ಹಾಗೂ ವಿಮಾನಗಳನ್ನು ಹೊಡೆದುರುಳಿಸಲು ಬಳಸುವ ವಾಯು ರಕ್ಷಣಾ ವ್ಯವಸ್ಥೆಯನ್ನು ರವಾನಿಸುವುದಾಗಿ ಹೇಳಿದೆ. ವಿಶೇಷವೆಂದರೆ, ಇದು ಈಗಾಗಲೇ ಇಸ್ರೇಲ್ ಸೇನೆಯಲ್ಲಿದೆ. ಅದನ್ನೇ ಭಾರತಕ್ಕೆ ನೀಡಲು ಮುಂದೆ ಬಂದಿರುವುದು ಗಮನಾರ್ಹ. ಈ ವ್ಯವಸ್ಥೆಯನ್ನು ಲಡಾಖ್ ಗಡಿಯಲ್ಲಿ ನಿಯೋಜಿಸಲಾಗುತ್ತದೆ ಎಂದು ಹೇಳಲಾಗಿದೆ.
ಭಾರತಕ್ಕೆ ಬೇಕಾಗಿರುವ ಅಗತ್ಯ ಶಸ್ತ್ರಾಸ್ತ್ರಗಳನ್ನು ಒದಗಿಸುವುದಾಗಿ ಇತ್ತೀಚೆಗೆ ರಷ್ಯಾ ಪ್ರವಾಸ ಕೈಗೊಂಡಿದ್ದ ರಕ್ಷಣಾ ಮಂತ್ರಿ ರಾಜನಾಥ ಸಿಂಗ್ ಅವರಿಗೆ ಆ ದೇಶದಿಂದ ಭರವಸೆ ದೊರೆತಿದೆ. ತನಗೆ ಯಾವೆಲ್ಲಾ ಶಸ್ತ್ರಾಸ್ತ್ರಗಳು ಬೇಕು ಎಂಬ ಪಟ್ಟಿಯನ್ನೇ ರಷ್ಯಾಗೆ ಭಾರತ ನೀಡಿದೆ. ಅದರ ಮೊತ್ತ 7500 ಕೋಟಿ ರು. ಆಗುತ್ತದೆ. ಕೆಲವೇ ವಾರದಲ್ಲಿ ಆ ಶಸ್ತ್ರಾಸ್ತ್ರಗಳು ಭಾರತಕ್ಕೆ ದೊರೆಯಲಿವೆ.
ಯಾವ ದೇಶದಿಂದ ಏನೇನು ಭರವಸೆ:
ಫ್ರಾನ್ಸ್: 4 ರಫೇಲ್ ಯುದ್ಧ ವಿಮಾನದ ಜತೆಗೆ ಹೆಚ್ಚುವರಿ ವಿಮಾನಗಳು ಭಾರತಕ್ಕೆ ಹಸ್ತಾಂತರ
ಇಸ್ರೇಲ್: ಕ್ಷಿಪಣಿ, ವಿಮಾನ ಹೊಡೆದುರುಳಿಸಲು ತನ್ನ ಸೇನೆಯಲ್ಲಿರುವ ವಾಯು ರಕ್ಷಣಾ ವ್ಯವಸ್ಥೆ ನೀಡುವ ಭರವಸೆ
ರಷ್ಯಾ: 7500 ಕೋಟಿ ರು. ಮೊತ್ತದ ಯುದ್ಧ ಸಲಕರಣೆಗಳನ್ನು ಕೆಲವೇ ವಾರದಲ್ಲಿ ಪೂರೈಸುವ ಆಶ್ವಾಸನೆ
ಅಮೆರಿಕ: ಗುಪ್ತಚರ ಮಾಹಿತಿ, ಉಪಗ್ರಹ ಚಿತ್ರ ಜತೆಗೆ ಫಿರಂಗಿಗಳಿಗೆ ಮದ್ದು- ಗುಂಡು. ಇನ್ನೂ ಏನೇನು ಬೇಕೆಂದು ಪಟ್ಟಿಕೇಳಿದ ‘ದೊಡ್ಡಣ್ಣ’……
