ಶ್ರೀನಗರ:
ಉಗ್ರರ ಜತೆಗಿನ ಎನ್ಕೌಂಟರ್ ವೇಳೆ ಸೇನಾ ಶ್ವಾನವೊಂದು ಅಪ್ರತಿಮ ಸಾಹಸ ಪ್ರದರ್ಶಿಸಿದೆ. ಆಕ್ರಮಣ ಶ್ವಾನವು ಜಮ್ಮು ಮತ್ತು ಕಾಶ್ಮೀರದ ಅನಂತನಾಗ್ ಜಿಲ್ಲೆಯಲ್ಲಿ ಸೋಮವಾರ ಭದ್ರತಾ ಪಡೆಗಳು ಮತ್ತು ಭಯೋತ್ಪಾದಕರ ನಡುವಿನ ಗುಂಡಿನ ಚಕಮಕಿಯಲ್ಲಿ ಗಾಯಗೊಂಡಿದೆ. ಭಯೋತ್ಪಾದಕರ ಹಾಜರಾತಿ ಬಗ್ಗೆ ನಿರ್ದಿಷ್ಟ ಮಾಹಿತಿ ಬಂದ ಹಿನ್ನೆಲೆಯಲ್ಲಿ ದಕ್ಷಿಣ ಕಾಶ್ಮೀರದಲ್ಲಿರುವ ಅನಂತನಾಗ್ ಜಿಲ್ಲೆಯ ತಂಗ್ಪಾವಾ ಪ್ರದೇಶವನ್ನು ಭಾನುವಾರ ರಾತ್ರಿ ಸುತ್ತುವರಿದಿದ್ದ ಭದ್ರತಾ ಪಡೆಗಳು, ಹುಡುಕಾಟ ಕಾರ್ಯಾಚರಣೆ ನಡೆಸಿದ್ದವು. ಉಗ್ರರು ಅವಿತುಕೊಂಡಿದ್ದಾರೆ ಎಂದು ಶಂಕಿಸಲಾಗಿದ್ದ ಮನೆಯೊಂದರ ಒಳಗೆ ‘ಜೂಮ್’ ಎಂಬ ಹೆಸರಿನ ಆಕ್ರಮಣ ಶ್ವಾನವನ್ನು ಸೇನೆ ಸೋಮವಾರ ಬೆಳಿಗ್ಗೆ ಕಳುಹಿಸಿತ್ತು.
#WATCH | In an operation in Kokernag, Anantnag, Army's dog 'Zoom' attacked terrorists & received 2 gunshot injuries. In spite of that, he continued his task which resulted in neutralisation of 2 terrorists. The canine is under treatment in Srinagar, J&K.
(Source: Chinar Corps) pic.twitter.com/D6RTiWqEnb
— ANI (@ANI) October 10, 2022
“ಜೂಮ್ ಬಹಳ ತರಬೇತಿ ಪಡೆದ, ಆಕ್ರಮಣಕಾರಿ ಸ್ವಭಾವದ ಮತ್ತು ಬದ್ಧತೆಯುಳ್ಳ ಶ್ವಾನವಾಗಿದೆ. ಅದು ಭಯೋತ್ಪಾದಕರು ಇರುವ ಜಾಗವನ್ನು ಪತ್ತೆ ಮಾಡುವ ಮತ್ತು ಅವರನ್ನು ನಿಯಂತ್ರಿಸುವ ತರಬೇತಿಯನ್ನು ಕೂಡ ಪಡೆದುಕೊಂಡಿದೆ” ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ದಕ್ಷಿಣ ಕಾಶ್ಮೀರದಲ್ಲಿ ನಡೆದ ಅನೇಕ ಸಕ್ರಿಯ ಕಾರ್ಯಾಚರಣೆಗಳಲ್ಲಿ ಜೂಮ್ ಭಾಗಿಯಾಗಿದೆ. ಸೋಮವಾರ, ಎಂದಿನಂತೆ ಉಗ್ರರು ಅಡಗಿದ್ದ ಮನೆಯಲ್ಲಿ ದಾಳಿ ನಡೆಸುವಂತೆ ಜೂಮ್ ಅನ್ನು ಕಳುಹಿಸಲಾಗಿತ್ತು. ಆದರೆ ಕಾರ್ಯಾಚರಣೆ ವೇಳೆ ಜೂಮ್ ಮೇಲೆ ಉಗ್ರರು ಎರಡು ಗುಂಡುಗಳನ್ನು ಹಾರಿಸಿದ್ದಾರೆ. ಅದು ತೀವ್ರವಾಗಿ ಗಾಯಗೊಂಡಿದೆ.
“ಭಯೋತ್ಪಾದಕರನ್ನು ಗುರುತಿಸಿದ ಜೂಮ್, ಅವರ ಮೇಲೆ ದಾಳಿ ನಡೆಸಿತ್ತು. ಆಗ ಅದು ಗುಂಡೇಟು ತಿಂದಿದೆ” ಎಂದು ಅಧಿಕಾರಿಗಳು ಹೇಳಿದ್ದಾರೆ. ಗುಂಡೇಟಿನಿಂದ ತೀವ್ರ ಗಾಯಗೊಂಡಿದ್ದರೂ, ಜೂಮ್ ತನ್ನ ರೋಷಾವೇಶವನ್ನು ನಿಲ್ಲಿಸಿರಲಿಲ್ಲ. ಅದು ಉಗ್ರರ ಮೇಲಿನ ಆಕ್ರಮಣವನ್ನು ಮುಂದುವರಿಸಿತ್ತು. ಅದರ ದಾಳಿಯಿಂದಾಗಿ ಇಬ್ಬರು ಉಗ್ರರನ್ನು ಹತ್ಯೆ ಮಾಡುವುದು ಸಾಧ್ಯವಾಗಿದೆ.
“ಗಂಭೀರ ಗಾಯಗಳಾಗಿದ್ದರೂ, ಧೈರ್ಯಶಾಲಿ ಯೋಧ ತನ್ನ ಕರ್ತವ್ಯವನ್ನು ಮುಂದುವರಿಸಿದ್ದ. ಇದರ ಪರಿಣಾಮ ಇಬ್ಬರು ಉಗ್ರರನ್ನು ಹೊಡೆದುರುಳಿಸಲು ಸಾಧ್ಯವಾಯಿತು” ಎಂದಿದ್ದಾರೆ. ಜೂಮ್ ಅನ್ನು ಕೂಡಲೇ ಸೇನೆಯ ಪಶುವೈದ್ಯ ಆಸ್ಪತ್ರೆಗೆ ಸಾಗಿಸಲಾಗಿದೆ. ಅಲ್ಲಿ ಅದಕ್ಕೆ ಚಿಕಿತ್ಸೆ ನೀಡಲಾಗುತ್ತಿದೆ. ಎನ್ಕೌಂಟರ್ನಲ್ಲಿ ಲಷ್ಕರ್ ಎ ತಯಬಾದ ಇಬ್ಬರು ಉಗ್ರರನ್ನು ಹತ್ಯೆ ಮಾಡಲಾಗಿದೆ. ಅನೇಕ ಸೈನಿಕರು ಕೂಡ ಕಾರ್ಯಾಚರಣೆಯಲ್ಲಿ ಗಾಯಗೊಂಡಿದ್ದಾರೆ……