ಬೆಂಗಳೂರು:
ಸ್ಯಾಂಡಲ್‌ವುಡ್‌ನಲ್ಲಿ ನಾಯಕಿಯರು ಇತ್ತೀಚಿನ ದಿನಗಳಲ್ಲಿ ಭಿನ್ನ, ಚಾಲೆಂಜಿಂಗ್ ಪಾತ್ರಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ಈ ಸಾಲಿಗೆ ಈಗ ಸೋನು ಗೌಡ ಸಹ ಸೇರಿಕೊಂಡಿದ್ದಾರೆ. ಸ್ಯಾಂಡಲ್ವುಡ್ ನಟಿ ಸೋನು ಗೌಡ ಇದುವರೆಗೂ ಲವ್‌ ಸ್ಟೋರಿ, ಆ್ಯಕ್ಷನ್‌, ಥ್ರಿಲ್ಲರ್‌, ಸಾಮಾಜಿಕ ಕಳಕಳಿಯ ಚಿತ್ರ ಹೀಗೆ ಹಲವು ಸಿನಿಮಾಗಳಲ್ಲಿ ಎಲ್ಲಾ ರೀತಿಯ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಈಗ ಮೊದಲ ಬಾರಿಗೆ ಅವರು ಲೈಂಗಿಕ ಕಾರ್ಯಕರ್ತೆಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಹೌದು, ಮೊನ್ನೆಯಷ್ಟೇ ನಟಿ ಮಯೂರಿ ಕ್ಯಾಥರಿ ‘ವ್ಹೀಲ್‌ ಚೇರ್‌ ರೋಮಿಯೋ’ ಸಿನಿಮಾದಲ್ಲಿ ಅಂತಹದ್ದೊಂದು ಪಾತ್ರದಲ್ಲಿ ನಟಿಸಿದ್ದರು. ಈಗ ಸೋನು ಗೌಡ ಸರದಿಯಾಗಿದೆ. ಹೊಸ ನಿರ್ದೇಶಕ ಯುವ ಧೀರ ಎಂಬವರು ನಿರ್ದೇಶನ ಮಾಡಿ ತಾವೇ ನಾಯಕರಾಗಿ ನಟಿಸುತ್ತಿರುವ ‘ಗುಡ್‌ ಗುಡ್ಡರ್‌ ಗುಡ್ಡೆಸ್ಟ್‌’ ಎಂಬ ಸಿನಿಮಾದಲ್ಲಿ ಸೋನು ಲೈಂಗಿಕ ಕಾರ್ಯಕರ್ತೆಯಾಗಿ ನಟಿಸುತ್ತಿದ್ದಾರೆ.
‘ನನಗೆ ಮೊದಲು ನಿರ್ದೇಶಕರು ಬಂದು ಕಥೆ ಹೇಳಿದಾಗ, ಯೋಚಿಸಿ ಹೇಳುತ್ತೇನೆ ಎಂದಿದ್ದೆ. ಆಗ ನಾನು ‘ಜೊತೆ ಜೊತೆಯಲಿ’ ಸೀರಿಯಲ್‌ನಲ್ಲಿ ನಟಿಸುತ್ತಿದ್ದ ಕಾರಣ, ಅಲ್ಲಿ ಹಿರಿಯ ನಟಿ ವಿಜಯಲಕ್ಷ್ಮಿ ಸಿಂಗ್‌ ಅವರಿಗೆ ಕಥೆ ಹೇಳಿದೆ. ಆಗ ಅವರು, ‘ಕಥೆ ಬಹಳ ಚೆನ್ನಾಗಿದೆ, ಒಪ್ಪಿಕೊಂಡು ಮಾಡು. ಯಾವಾಗಲೂ ಒಂದೇ ರೀತಿಯ ಪಾತ್ರ ಮಾಡುವುದಕ್ಕಿಂತಲೂ ಈ ರೀತಿ ಭಿನ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳಬೇಕು’ ಎಂದು ಸಲಹೆ ನೀಡಿದರು. ಮತ್ತೊಬ್ಬ ಹಿರಿಯ ನಟಿ ಸುಂದರಶ್ರೀ ನನಗೆ ಹಲವು ದೊಡ್ಡ ದೊಡ್ಡ ನಟಿಯರ ಉದಾಹರಣೆ ನೀಡಿ ಒಪ್ಪಿಕೊ ಎಂದು ಹೇಳಿದರು. ಈ ಪಾತ್ರ ಒಪ್ಪಿಕೊಳ್ಳಲು ಅವರಿಬ್ಬರು ಹೇಳಿದ ಸ್ಫೂರ್ತಿಯ ಮಾತುಗಳೇ ಕಾರಣ’ ಎಂದು ಹೇಳುತ್ತಾರೆ ಸೋನು ಗೌಡ.
‘ಈ ಸಿನಿಮಾದಲ್ಲಿ ನನ್ನ ಪಾತ್ರ ಬೋಲ್ಡ್‌ ಆಗಿರುತ್ತದೆ. ಅದರರ್ಥ ದೇಹ ಪ್ರದರ್ಶನವಲ್ಲ, ನನ್ನ ನಟನೆಯಲ್ಲಿ ಬೋಲ್ಡ್‌ನೆಸ್‌ ಇರುತ್ತದೆ. ಭಾವನಾತ್ಮಕ ಅಂಶಗಳಿವೆ. ಇದುವರೆಗೂ ನಾನು ನಿರ್ವಹಿಸದೇ ಇರುವಂತಹ ಪಾತ್ರವದು. ಎಲ್ಲಾ ವಿಚಾರದಲ್ಲಿಯೂ ಹೊಸ ರೀತಿಯ ಅನುಭವ ಕೊಟ್ಟಂತಹ ಕಥೆ ಎನ್ನಬಹುದು. ಮೊದಲನೇ ದಿನ ಚಿತ್ರೀಕರಣದಲ್ಲಿ ನನಗೆ ಮುಜುಗರವಾಗುತ್ತಿತ್ತು. ನಾನು ಮಾಡುತ್ತಿರುವುದು ಸರಿ ಇದೆಯಾ, ಒಂದು ವೇಳೆ ಮುಂದಿನ ದಿನಗಳಲ್ಲಿ ಇದೇ ರೀತಿಯ ಪಾತ್ರಗಳು ಹುಡುಕಿಕೊಂಡು ಬಂದರೆ ಏನು ಮಾಡುವುದು ಎಂಬೆಲ್ಲಾ ಆಲೋಚನೆಗಳು ಬಂದವು. ಆದರೆ ಒಂದು ಹಂತದಲ್ಲಿ ಸೋನು ಗೌಡ ಇಂತಹುದೇ ಪಾತ್ರಗಳನ್ನು ಮಾತ್ರ ನಿರ್ವಹಿಸುತ್ತಾರೆ ಎಂಬಂತಹ ಕಟ್ಟುಪಾಡುಗಳನ್ನು ಹೊಡೆದು ಹಾಕಿದ್ದೇನೆ ಎನಿಸಿತು. ‘ಗುಡ್‌ ಗುಡ್ಡರ್‌ ಗುಡ್ಡೆಸ್ಟ್‌’ ಸಿನಿಮಾ ನನ್ನ ವೃತ್ತಿ ಬದುಕಿನಲ್ಲಿ ಚಾಲೆಂಜಿಂಗ್ ಪಾತ್ರ ಎನ್ನಬಹುದು’ ಎನ್ನುವುದು ಸೋನು ಗೌಡ ಅವರ ಅಭಿಪ್ರಾಯ.
ಈಗಾಗಲೇ ಚಿತ್ರೀಕರಣ ಆರಂಭವಾಗಿದ್ದು, ಸುಚೇಂದ್ರ ಪ್ರಸಾದ್‌, ಗೋಪಾಲಕೃಷ್ಣ ದೇಶಪಾಂಡೆ, ವಿ. ಮನೋಹರ್‌ ಸೇರಿದಂತೆ ಹಲವರು ನಟಿಸುತ್ತಿದ್ದಾರೆ. ‘ಜನ ನನ್ನನ್ನು ಪೊಲೀಸ್‌, ಪ್ರೀತಿಸುವ ಹುಡುಗಿ, ಗೃಹಿಣಿ, ಲಾಯರ್‌ ಹೀಗೆ ಬೇರೆ ಬೇರೆ ರೀತಿಯ ಪಾತ್ರಗಳಲ್ಲಿ ನೋಡಿದ್ದಾರೆ. ಈಗ ಹೊಸ ರೀತಿಯ ಪಾತ್ರದಲ್ಲಿ ನೋಡುತ್ತಾರೆ. ನನ್ನ ನಟನೆಗೆ ಸವಾಲೊಡ್ಡುವ ಪಾತ್ರವಿದು’ ಎಂದಿದ್ದಾರೆ ನಟಿ ಸೋನು ಗೌಡ…..
